Dyma’r tymor i deithio gyda TrawsCymru

Wrth i’r hydref ildio i fisoedd oeraidd y gaeaf, does dim rhaid i hynny fod yn rheswm dros aros dan do.

Gyda’r Nadolig ar y gorwel, mae’n bryd estyn y cotiau gaeaf hynny, gwisgo’ch hetiau a’ch sgarffiau, a mynd allan a mwynhau’r marchnadoedd a’r dathliadau Nadolig gwych sy’n digwydd mewn lleoliadau ar draws rhwydwaith TrawsCymru.

Rydyn ni wedi creu detholiad o’n hoff leoliadau Nadoligaidd ynghyd â gweithgareddau gwych i’ch cadw chi’n brysur yn y cyfnod cyn y Nadolig.

Cynlluniwch eich taith ar ein gwefan, ac ewch ar ap TrawsCymru i brynu tocynnau.

Betws-y-Coed – T10

Mae tymor yr ŵyl yn amser perffaith i ymweld â phrydferthwch Betws-y-Coed. Gallai’r pentref mynydd gwych hwn gael ei gamgymryd am gyrchfan Alpaidd ar yr adeg hon o’r flwyddyn. Wedi’i leoli yn nyffryn Conwy, mae’n cynnwys digonedd o siopau sy’n gwerthu’r holl nwyddau awyr agored gorau a chrefftau lleol o safon. Mae hefyd yn lle perffaith ar gyfer taith gerdded yn y gaeaf. Bydd ein gwasanaeth T10 yn mynd â chi yno.

Marchnad Nadolig Bryste – T7

Cymerwch daith fer ar ein gwasanaeth T7 o Gas-gwent dros y bont i Fryste i weld beth welwch chi yn y Farchnad Nadolig wych yno. Yn gartref i fwy na 35 o stondinau Nadolig, mae digon i’ch cadw’n brysur wrth i chi wneud eich ffordd o gwmpas. Bydd Siôn Corn a’i gorachod hefyd yn y dref i helpu’r plant gyda’u rhestr anrhegion Nadolig. Mae cerddoriaeth fyw hefyd i’w mwynhau ochr yn ochr â bwyd a diodydd blasus. Cewch ragor o wybodaeth yma.

Llun: Marchnad Nadolig Bryste

Cas-gwent – T7

Mae’r dref fach hyfryd hon ar lannau afon Gwy yn lle gwych i ymweld â hi adeg y Nadolig – dim llai oherwydd ei chastell trawiadol sy’n sefyll yn gadarn ar ymyl y clogwyn, gan edrych ar draws i Loegr. Mae gan Gae Ras Cas-gwent amserlen lawn arall o rasys a digwyddiadau arbennig i’w mwynhau ym mis Rhagfyr eleni. Os ydych chi awydd prynhawn yn y rasys neu os oes gennych chi awydd Bingo Lingo, mae digon o hwyl Nadoligaidd ar gael. Cynhelir Marchnad Nadolig y dref ddydd Sul 10 Rhagfyr rhwng 10am a 3pm.

Llun: Cadw

Marchnad Nadolig Caerdydd – T4 a T1C

Mae’r brifddinas bob amser yn llawn bwrlwm yr ŵyl, ac nid yw eleni’n wahanol. Mae marchnad Nadolig enwog Caerdydd ymlaen tan 23 Rhagfyr ac mae’n werth ymweld â hi. Ar ben hynny, gallwch hefyd fynd i Ŵyl y Gaeaf, digwyddiad poblogaidd sydd ar hyd Lawnt Neuadd y Ddinas a Chastell Caerdydd. Os ydych chi’n mynd i’r castell, gwnewch yn siŵr bod eich esgidiau sglefrio’n barod. Ewch i Gaerdydd drwy deithio ar ein gwasanaethau T4 a T1C.

Marchnad Nadolig Caer - T8

Mae’r ddinas ffiniol hon yn lleoliad delfrydol dros gyfnod y Nadolig. Mae Marchnad Nadolig Caer yn dychwelyd am flwyddyn arall o hwyl yr ŵyl, gyda 70 o fasnachwyr wedi’u lleoli yn y sgwâr o amgylch neuadd y dref. Porwch drwy arcêd newydd steilus y ddinas a’r fforwm sy’n amgylchynu’r brif goeden adnabyddus yng nghanol y ddinas.

Llun: Ymweld â Swydd Gaer

Hwlffordd – T5 a T11

Ewch i Hwlffordd a phori drwy’r Ffair Nadolig ym Maes Sioe Sir Benfro. Ddydd Sul, Rhagfyr 10, 2023, bydd adeilad Parkhouse ar Faes Sioe Hwlffordd yn cael ei drawsnewid yn baradwys Nadolig. Bydd hyd yn oed mwy o stondinau eleni gydag amrywiaeth eang o fusnesau lleol o safon uchel yn arddangos, yn ogystal â cherddoriaeth Nadoligaidd, Santa yn ei Groto ac ardal fwyd.

Y Gelli Gandryll – T14

Ewch ar ein gwasanaeth T14 i ‘dref y llyfrau’ y Nadolig hwn. Mae’r Gelli Gandryll yn dref farchnad brydferth ar y ffin rhwng Cymru a Lloegr. Yn ogystal ag ymgolli yn siopau llyfrau niferus y dref, mae digon o hwyl Nadoligaidd ymlaen eleni. Bydd Hay Markets yn cynnal trydedd Ffair Nadolig y Gelli ddydd Sadwrn 9 Rhagfyr, gyda mwy na 100 o fasnachwyr yng nghanol y dref yn dod ag anrhegion Nadoligaidd, crefftau lleol a nwyddau cartref – yn ogystal â bwyd a diod blasus!

Llun: Hay Chamber of Commerce

Henffordd – T14

Mae strydoedd cul a chlyd Henffordd yn llawn siopau annibynnol a thafarnau hyfryd, gan ei wneud yn lleoliad delfrydol i ymweld ag ef y Nadolig hwn. Mae’n rhaid ymweld â’r eglwys gadeiriol ysblennydd ar yr adeg hon o’r flwyddyn – sy’n cynnal ei Ffair Nadolig ei hun yn rheolaidd. Mae llawer mwy o weithgareddau i'ch cadw'n brysur yn y ddinas hanesyddol hon ac mae rhagor o wybodaeth ar gael yma.

Wrecsam – T3 a T12

Ewch i ddinas mwyaf newydd Cymru ar ein gwasanaeth T3 neu T12 ac archwilio ei Gŵyl Aeaf a Marchnad Nadolig ym Mharc Bellevue, a gynhelir rhwng dydd Gwener 8 a dydd Sul 10 Rhagfyr.

Llun: Wrexham Christmas Market