Mwynhewch noson allan gan ddefnyddio’r bws T1
1 flwyddyn yn ôl
Mwynhewch noson allan gan ddefnyddio’r bws T1
Oeddech chi'n gwybod bod gwasanaeth bws y T1 bellach yn cynnig teithiau gyda'r nos?
Mae teithiau ychwanegol yn golygu mwy o opsiynau teithio i chi a mwy o gyfleoedd i dreulio noson allan. Dyma rai awgrymiadau i wneud y gorau o'r teithiau hwyrach.
Swper yng Nghaerfyrddin
Ydych chi am dreulio’r diwrnod yng Nghaerfyrddin? Mwynhewch bryd o fwyd gyda'r nos a neidiwch ar y bws adref ar ôl i chi gael digon. Os ydych chi'n ffansio bwyd Eidalaidd traddodiadol, mae Florentino's yn drysor cudd wedi'i guddio i lawr un o'r strydoedd bach. I groesawu'r penwythnos gyda stêc a sglodion, ewch i Dexters. Mae'r ddau fwyty ond ychydig funudau ar droed o safle bws y T1.
Diodydd yn Aberystwyth
Os ydych chi wedi gadael y car gartref ac eisiau diod ar lan y môr, mae gan Aberystwyth ddigon o opsiynau.
Ar gyfer coctels ar yr arfordir, mae Bar Coctels Libertine yn cynnig diodydd unigryw mewn lleoliad hamddenol a chyfforddus. Mae coctels Y Bañera yn cynnig blas Sbaen yn Aberystwyth, ac fe’i henwyd yn un o'r ymgeiswyr terfynol yng nghystadleuaeth y Bar Gorau yng Nghymru.
Os ydych chi’n chwilio am awyrgylch tafarn glasurol, mae gennych chi ddigon o dafarndai i ddewis ohonynt, fel Yr Hen Lew Du, Ship & Castle a llawer mwy.
Noson ramantus yn Aberaeron
Tref hardd Aberaeron yw’r lle perffaith ar gyfer noson ramantus allan. Crwydrwch ar hyd yr harbwr lliwgar ac ewch i siop anrhegion i fachu cofrodd unigryw. Am fwyd, mae digon o opsiynau sy'n cynnig pob math o seigiau blasus. Am olygfeydd hardd o'r harbwr, mae’r Harbourmaster a’r Seler yn fwytai uchel eu parch. Gyda'r safle bws ond ychydig funudau i ffwrdd ar droed, does dim angen y car arnoch.
Siopa ar ôl gwaith
Hoffech chi wneud ychydig o siopa Nadolig cynnar? Gyda bysiau T1 hwyrach, gallwch osgoi torfeydd y penwythnos a chrwydro’r siopau’n hamddenol ar ôl gwaith. P'un a ydych chi’n chwilio am frandiau mawr neu siopau annibynnol, mae digon o siopau a pharciau manwerthu ar hyd y llwybr T1.
Gweithio’n hwyr
Os ydych chi'n gweithio'n hwyr yn yr ardaloedd hyn, beth am ystyried teithio ar fws gyda'r nos? Gallech arbed arian petrol ac ymlacio tra bod ein gyrwyr yn eich cludo adref yn ddiogel.
Cynlluniwch eich taith ar y T1 yma: Llwybrau a mapiau